Grínistinn Hjálmar Örn Jóhannsson var gestur í útvarpsþættinum Fótbolti.net í gær. Þar ræddi hann meðal annars hætturnar sem geta stafað af því að skemmta sér með enskum fótboltastuðningsmönnum erlendis.

England og Ítalía mætast í úrslitaleik Evrópumótsins í kvöld. Margir Íslendingar styðja við bakið á Englendingum í kvöld. Einverjir eru jafnvel mættir til Lundúna til að taka þátt í stemmningunni ef fótboltinn skildi koma ,,heim.“

Hjálmar segist sjálfur hafa nokkra reynslu af því að skemmta sér með Englendingum yfir knattspyrnuleikjum.

,,Fyrir þá sem eru að fara þarna út, skemmtið ykkur en gætið ykkar líka. Ég hef alveg upplifað þetta nokkrum sinnum. Þeir ( enskir stuðningsmenn) eru kátir en svo þegar það súrnar þá eru þeir ekki mjög kátir,“ sagði Hjálmar í þættinum.

Hann rifjaði svo upp þegar hann komst nálægt því að verða fyrir árás á krá þar sem enskir stuðninsgmenn höfðu haldið að hann væri þýskur.

,,Það var hópur af Englendingum sem stóðu við barinn og það kemur upp að okkur stelpa og segir við okkur ‘eruði þýskir’? Ég segi ‘nei við erum Íslendingar’. Hún segir ‘Vá, þeir voru svona frá því að ætla að lemja ykkur’.

Leikurinn í kvöld fer fram á Wembley. Hann hefst klukkan 19 að íslenskum tíma.