Þrír leikir voru spilaðir í 11. umferð 2.deildar karla fyrr í dag.
KF burstaði Hauka
KF tók á móti Haukum fyrir norðan og fór ansi illa með Hafnfirðinga.
Omar Diouck kom heimamönnum yfir snemma leiks og bætti við öðru marki á 32. mínútu.
Grétar Áki Bergsson skoraði þriðja mark KF snemma í seinni hálfleik. Áki Sölvason gerði endanlega út um leikinn með fjórða markinu þegar stundarfjórðungur lifði leiks.
Diouck átti svo eftir að bæta einu marki við í lok leiks. Lokatölur 5-0.
KF er í fjórða sæti deildarinnar með 17 stig. Haukar eru í sjöunda sæti með 15 stig.
Tíu leikmenn Magna með sigur
Magni vann góðan útisigur á Kára.
Guðni Sigþórsson kom gestunum yfir á 18. mínútu. Andri Júlíusson jafnaði stuttu síðar fyrir Kára.
Alejandro Manuel Munoz Cabelle kom Magna aftur yfir eftir klukkutíma leik.
Þegar tuttugu mínútur lifðu leiks fékk Alexander Ívan Bjarnason, leikmaður Magna, rautt spjald. Það kom þó ekki að sök. Magni hélt út. Lokatölur 1-2.
Magni er í níunda sæti deildarinnar með 13 stig. Kári er með 6 stig í ellefta sæti, 6 stigum frá öruggu sæti.
Völsungur vann Njarðvík
Völsungur vann nokkuð óvæntan sigur á Njarðvík á Húsavík.
Eina mark leiksins skoraði Santiago Feuilassier Abalo af vítapunktinum. Lokatölur 1-0.
Völsungur er í fimmta sæti með 17 stig. Njarðvík er í öðru sæti með 20 stig.
