Rúnar Þór Sigurgeirsson, vinstri bakvörður Keflavíkur, stóðst ekki læknisskoðun hjá sænska félaginu Sirius í vikunni og er því snúinn aftur heim til Íslands. Það var greint frá þessu á Fótbolta.net í morgun.
Rúnar Þór hefur glímt við nárameiðsli og þar sem Sirius er í leit að vinstri bakverði sem getur spilað strax gengu skiptin ekki upp í bili.
„Þeir eru ennþá áhugasamir en vantar vinstri bakvörð sem getur byrjað að spila strax. Ég fór í skanna þar sem nárasvæðið var skoðað og á eftir að fá niðurstöðu úr því,“ sagði Rúnar Þór við Fótbolta.net.
„Þetta er högg en ég stend upp og held áfram,“ bætti hann við.
Rúnar Þór lék sinn fyrsta A-landsleik fyrir rúmum mánuði síðan. Það var í vináttulandsleik gegn Mexíkó.
