KR horfir á markvörðinn Guy Smit, hjá Leikni Reykjavík, sem hugsanlegan arftaka Beitis Ólafssonar. Það var greint frá þessu í nýjasta þætti Dr. Football.

Beitir hefur staðið sig vel í marki KR frá því hann kom til liðsins snemma sumars 2017. Hann er þó orðinn 35 ára gamall. Því er félagið væntanlega farið að horfa á aðra markverði með framtíðina að sjónarmiði. Beitir er samningsbundinn KR út næstu leiktíð.

Smit er 25 ára gamall Hollendingur sem hefur leikið með Leikni frá því síðasta sumar. Hann hjálpaði liðinu til að mynda upp í efstu deild í haust. Smit er samningsbundinn Leikni út leiktíðina.

Kristján Óli Sigurðsson, sem greindi frá því að KR hefði áhuga á Smit, virðist ekki ýkja spenntur fyrir þessum hugsanlegu félagaskiptum.

,,Mér finnst Guy Smit ágætis markmaður en ef KR ætlar að fara að sækja málma aftur, sem er væntanlega krafan vestur í bæ, þá er þetta ekki markmaður sem er að fara að færa málma í Frostaskjólið,“ sagði Kristján í Dr. Football.

Arnar Sveinn Geirsson, formaður leikmannasamtakanna, var einnig í þættinum og tók hann í sama streng. ,,Ég myndi heldur ekki segja að þetta sé uppfærsla frá Beiti.“