Enska landsliðið er komið í undanúrslit á Evrópumótinu í knattspyrnu eftir 4-0 sigur gegn Úkraínu í 8-liða úrslitum. Englendingar mæta Dönum á Wembley í undanúrslitum.

Enskir aðdéndur eru greinilega hjátrúafullir en einn stuðningsmaður enska liðsins er alveg viss um það að klósettferðir sonarins séu að skila mörkum.

“Ég og sjö ára strákurinn minn, Henry, sitjum í sömu sætunum á sófanum í nýþvegnum landsliðstreyjum fyrir hvern leik,” sagði maðurinn við Daily Star.

“Í tveimur leikjum hefur hann staðið upp til þess að fara á klósettið og England hefur skorað í öll skiptin. Þannig að núna látum við hann bara drekka nóg af vatni og safa áður en leikurinn byrjar. Hann er að gera þetta fyrir landið sitt.”

Fleiri sögur svipaðar þessari hafa verið að ganga um á samfélagsmiðlinum Twitter síðustu daga og ljóst að Englendingar hafa gaman af.