Arnór Borg Guðjohnsen framherji Fylkis í efstu deild karla er eftirsóttur biti þessa dagana. Fram kom í hlaðvarpsþættinum Dr. Football í dag að tvö félög væru að reyna að semja við hann.
Arnór gekk í raðir Fylkis fyrir um ári síðan en þá snéri hann heim úr atvinnumennsku og samdi við Fylki. Arnór fagnar 21 árs afmæli sínu síðar á þessu ári.
Í skýrslu Kristjáns Óla Sigurðssonar í Dr. Football kom fram að bæði Víkingur og FH væru að reyna að klófesta þennan öfluga sóknarmann.
Samningur Arnórs við Fylki er á enda í haust og því geta öll félög samið við hann, einnig er sá möguleiki fyrir hendi að félögin kaupi Arnór af Fylki á næstu dögum.
Arnór ólst upp í Breiðablik áður en hann hélt til Swansea þar sem hann var í þrjú ár. Hann á ekki langt að sækja hæfileikana en faðir hans er Arnór Guðjohnsen og bróðir hans er Eiður Smári Guðjohnsen.
Knattspyrnugenin í ættinni eru merkileg en synir Eiðs Smára eru þrír, Andri Lucas og Daníel Tristan Guðjohnsen leika með yngri liðum Real Madrid og Sveinn Aron Guðjohnsen er á mála hjá Spezia á Ítalíu.
