Aron Einar Gunnarsson fyrirliði Íslands í knattspyrnu opnar sig um lífið og tilveruna í einlægu viðtali við Sigmund Ernir Rúnarsson á Hringbraut sem frumsýnt var í gær.
Aron Einar er staddur hér á landi í sumarfríi en hann spilar í dag með Al-Arabi í Katar. Aron hefur búið erlendis í 15 ár en aðeins 17 ára gamall samdi hann við AZ Alkmaar í Hollandi.
Lífið í Hollandi var ekki alltaf dans á rósum en Aron gafst ekki upp. „Ég fór til fjölskyldu sem að sá um mig, gott fólk sem að eldaði og þreif. Lærdómsríkur tími, ég hringdi oft í mömmu á kvöldin grátandi og vildi koma heim. Það var alltaf sama svarið Ímyndaðu þér hvað strákarnir í Þór myndu gefa fyrir þetta tækifæri´. Það ýtti mér áfram,“ sagði Aron Einar Gunnarsson á Hringbraut í gær.
19 ára gamall ákvað Aron að venda kvæði sínu í kross og gekk í raðir Coventry á Englandi. Þar varð að hann stjarna á einni nóttu en missti aðeins tökin eins og hann segir sjálfur frá.
„Holland var meiri hugsun en á Englandi er þetta trúarbrögð, það snýst allt um fótbolta. Ég flyt til Coventry en bað mömmu um að koma með mér, ég var að fara að búa einn í fyrsta skipti. Hún kemur þangað með mér, hún hjálpaði mér að venjast þessum heimi sem ég var að fara út í. Það er auðvelt fyrir ungan 19 ára strák að peppast upp við það og svífa um á skýi,“ segir Aron.
Aron segist hafa misst sjónar á því sem skiptir máli og farið að drekka meira og djamma. Hann sá það fljótt sjálfur.
„Ég fann alveg fyrir því, ég rak á mig á ýmsum stöðum. Maður sogast inn í það að vera meira en maður er, ég fór að partýja meira. Sérstaklega á seinna árinu í Coventry, þá var maður svaka karl. Þá var það eðlilegur lífsstíll að spila fyrir framan 18 þúsund,“ sagði Aron Einar.
Aron labbaði sjálfur á vegg og ákvað að taka sig í gegn. „Ég þurfti að taka mig niður, ég áttaði mig á því sjálfur með hjálp mömmu. Ég rak á mig, ég vissi það á þriðja árinu í Coventry að ég þyrfti að fara annað til að taka næsta skref. Ég var farinn að spila illa, ég sá það svart á hvítu,“ sagði Aron Einar.
Aron Einar hefur í 15 ár gert frábæra hluti í atvinnumennsku og staðið í stafni með besta íslenska landsliði sögunnar.
