Mikael Nikulásson, sérfræðingur í hlaðvarpsþættinum The Mike Show, hraunaði yfir KR í þætti dagsins. Hann var sérstaklega óánægður með gengi liðsins á heimavelli.
KR hefur aðeins náð í 4 stig í fimm heimaleikjum í Pepsi Max-deildinni í ár. Til samanburðar hefur liðið tekið 11 stig úr jafnmörgum útileikjum.
,,Það gengur öllum liðum ágætlega á KR-vellinum. Þetta er skemmtilegasti völlurinn til að spila á og menn bara peppast vel upp. Ég veit ekki hvað KR-ingarnir halda þegar þeir eru á heimavelli, þeir eru búnir að vera miklu betri á útivelli í þrjú ár, tvö allavega. Þetta er bara ófyrirgefanlegt,“ sagði Mikael.
Hann sagði einnig að félagið gæti þurft að horfa inn á við og íhugað breytingar. Rúnar Kristinsson er þjálfari liðsins.
,,Kannski þarf bara einhverjar breytingar í Vesturbæinn. Það er ekkert að gerast og hjá fullt af liðum yrði kallað eftir einhverjum breytingum. Þetta er bara eitthvað ‘status quo’ þarna hjá KR. Það virðist öllum bara vera nokkuð sama,“ sagði Mikael.
KR hefur aðeins einu sinni tekist að tengja saman tvo sigra í deildinni í ár. Mikael segir það seint teljast vænlegt til árangurs.
,,Þeir þurfa að fara að vinna þrjá, fjóra leiki í röð. Þú vinnur enga titla nema þú gerir það.“
