Sviss sló Frakka úr leik á EM 2020 nú fyrir stuttu. Það þurfti að grípa til vítaspyrnukeppni í leik liðanna í 16-liða úrslitum.
Frakkar voru ólíkir sjálfum sér í fyrri hálfleik. Haris Seferovic kom Sviss yfir eftir stundarfjórðung. Staðan í hálfleik var 1-0.
Á 55. mínútu fékk Ricardo Rodriguez gullið tækifæri til að tvöfalda forystu Svisslendinga af vítapunktinum. Hugo Lloris varði þó frá honum.
Í kjölfarið kviknaði á Frökkunum. Karim Benzema jafnaði leikinn á 57. mínútu og aðeins tveimur mínútum síðar var hann búinn að koma þeim yfir.
Það leit svo út fyrir að Paul Pogba væri að senda þá í 8-liða úrslit er hann skoraði glæsilegt mark á 75. mínútu. 3-1.
En eins og þessi dagur á EM kenndi okkur þá getur allt gerst í fótboltanum. Seferovic minnkaði muninn á 81. mínútu. Mario Gavranovic jafnaði svo leikinn á 90. mínútu. 3-3 eftir venjulegan leiktíma og því þurfti að fara í framlengingu.
Þar virkuðu bæði lið þreytt. Ekkert var skorað þar og gripið var til vítaspyrnukeppni.
Þar skoruðu allir úr sínum spyrnum þar til kom að Kylian Mbappe. Hann brenndi af fimmta víti Frakka og Sviss er komið í 8-liða úrslit. Heimsmeistarar Frakklands eru úr leik.
