Þorkell Máni Pétursson sérfræðingur Stúkunnar um efstu deild karla á Stöð2 Sport fór ekki fögrum orðum um leikmenn FH í þætti gærkvöldsins. Logi Ólafsson lét af störfum sem þjálfari liðsins í gær og Ólafur Jóhannesson tók við.

Ólafur er mættur aftur heim en hann var síðast með liðið árið 2007, Logi tók við þjálfun liðsins í vetur þegar Eiður Smári Guðjohnsen lét af störfum.

„Maður á eiginlega ekki til orð. Ekki að þetta hafi komið á óvart að Logi hafi verið látinn fara en ég veit ekki hvað er að frétta þarna. Ég er eiginlega spenntastur núna, þegar Óli Jóh tekur við liðinu, að sjá hvað þessir aumingjans menn, leikmenn Fimleikafélags Hafnarfjarðar, eiga eftir að finna sem næstu afsökun fyrir lélegu gengi sínu,“ sagði Máni í Stúkunni á Stöð2 Sport.

Rót hefur verið á FH-ingum síðustu ár, þjálfara hafa komið og farið og árangurinn innan vallar ekki verið í samræmi við væntingar.

„Þeir eru búnir að hafa Óla Kristjáns sem þjálfara og hann var ekki nógu skemmtilegur. Þeir fengu ekki borguð launin sín og það var vandamál. Þeir eru búnir að fá hvern þjálfarann á fætur öðrum og það er búið að kaupa leikmenn þarna inn,“ sagði Máni.

Máni telur að vandamál FH sé stærra en bara Logi Ólafsson.

„Ég held að gengi FH-liðsins hafi ekki nokkurn skapaðan hlut með Loga Ólafsson að gera. Þessir leikmenn þurfa heldur betur að líta í eigin barm. Þetta er frábær leikmannahópur en staðreyndin er sú að enginn í honum hefur sýnt okkur neitt í heilt tímabil að hann sé góður leikmaður. Ef þú ættir að kalla þetta lið eitthvað væri þetta Sigga Hlö-liðið, Veistu hver ég var? Ég var einu sinni góður í fótbolta.“