Tveimur leikjum er nýlokið í 7. umferð Pepsi Max-deildar kvenna.

Öruggt hjá Stjörnunni

Stjarnan tók á móti ÍBV í Garðabæ. Heimakonur unnu öruggan sigur.

Hildigunnur Ýr Benediktsdóttir kom Stjörnunni yfir á 13. mínútu. Það reyndist eina mark fyrri hálfleiks.

Deilaney Pridham fékk gullið tækifæri til að jafna fyrir gestina eftir tíu mínútur af seinni hálfleik af vítapunktinum. Birta Guðlaugdóttir í marki heimakvenna varði hins vegar frá henni.

Betsy Hassett tvöfaldaði forystu Stjörnunnar á 68. mínútu. Rúmum fimm mínútum síðar var Hildigunnur búin að gera út um leikinn með sínu öðru marki. Málfríður Erna Sigurðardóttir, leikmaður Stjörnunnar, fékk sitt annað gula spjald og þar með rautt í lok leiks. Lokatölur 3-0.

Stjarnan er í fjórða sæti deildarinnar með 10 stig. ÍBV er í því sjöunda með 9 stig.

Óvænt jafntefli á Hlíðarenda

Valur og Þór/KA gerðu jafntefli á Hlíðarenda.

Elín Metta Jensen skoraði eina mark fyrri hálfleiks á 19. mínútu.

Heimakonur leiddu út fyrri hálfleikinn en gestirnir jöfnuðu snemma í seinni hálfleik. Það gerði Margrét Árnadóttir af vítapunktinum. Lokatölur 1-1.

Valur er á toppi deildarinnar með 14 stig. Þór/KA er í áttunda sæti með 7 stig.