Ansi erfitt verkefni gæti beðið enska landsliðsins í 16-liða úrslitum, vinni þeir D-riðilinn á EM 2020. Það má í raun færa rök fyrir því að liðið fengi mun auðveldari andstæðing ef það endar í öðru sæti riðilsins.

Sigurvegarinn úr D-riðlinum, sem inniheldur Skotland, Tékkland og Króatíu, ásamt Englendingum, mætir nefnilega liðinu sem endar í öðru sæti í F-riðlinum, dauðariðlinum sjálfum. Í honum leika Frakkland, Portúgal, Ungverjaland og Þýskaland. Líklegt þykir að heimsmeistarar Frakka og Evrópumeistarar Portúgala endi í tveimur efstu sætunum. Það eru ekki beint ákjósanlegir andstæðingar strax í 16-liða úrslitum.

Aftur á móti mætir liðið sem hafnar í öðru sæti D-riðilsins liðinu sem hafnar í öðru sæti E-riðils. Sá riðill inniheldur Spán, Svíþjóð, Slóvakíu og Pólland. Það er ljóst að allir andstæðingar í þessum riðli eru í hið minnsta aðeins ákjósanlegri en Frakkland og Portúgal.

Sem stendur er England í öðru sæti D-riðils. Þeir mæta Tékkum í lokaleik riðilsins. Jafntefli þar tryggir þeim annað sætið í riðlinum. Hvort þeir hangi einfaldlega á stiginu gegn Tékkum verður að koma í ljós þegar þar að kemur.