Brynjar Ingi Bjarnason er á leið til Lecce á Ítalíu. Það var greint frá þessu í hlaðvarpsþættinum Dr. Football í kvöld.
Brynjar hefur farið vel af stað með KA í Pepsi Max-deildinni á leiktíðinni. Þá lék hann sínu fyrstu landsleiki á dögunum gegn Mexíkó, Færeyjum og Póllandi. Hann stóð sig vel í leikjunum og skoraði til að mynda gegn Pólverjum.
Í kjölfarið var þessi 21 árs gamli miðvörður orðaður við lið utan úr heimi. Nú er Lecce í Serie B að krækja í hann.
Samkvæmt því sem fram kom í Dr. Football nemur kaupverðið á bilinu 30 til 40 milljónum íslenskra króna. Þá mun KA einnig fá prósentu af næstu sölu á leikmanninum.
