Manchester United vill ekki borga 20 milljónir punda fyrir Kieran Trippier að því er segir í frétt Sportsmail.
United vill frekar borga í kringum 10 milljónir punda fyrir kappann en því tilboði var strax hafnað af spænsku meisturunum.
Kieran Trippier, sem er orðinn 30 ára gamall, vann La Liga með Atlético Madrid á tímabilinu. Hann er talinn vera einn af þeim leikmönnum sem Solskjaer leggur áherslu á að fá í sumar. Það eina sem fælir United frá er verðmiðinn.
Solskjaer er mjög hrifinn af leikmanninum og vill einnig fá samkeppni fyrir Aaron Wan-Bissaka. Í frétt Sportsmail segir að United ætli þó ekki að borga uppsett verð vegna aldurs Trippier ásamt því að hann á aðeins eitt ár eftir af samning.
Trippier er nú með enska landsliðinu á Evrópumótinu í knattspyrnu. Hann spilaði óvænt stöðu vinstri bakvarðar í fyrsta leik þeirra gegn Króatíu. Ýmsir miðlar halda því fram að hann hafi sagt við vini sína í landsliðinu að hann hafi mikinn áhuga á því að koma til Manchester United.
