KSÍ sendi frá sér yfirlýsingu vegna Eiðs Smára í dag. Myndband af honum að pissa við Ingólfstorg fór í dreifingu á samfélagsmiðlum á dögunum og vakti það mikla athygli.

KSÍ lýsir yfir stuðningi við Eið Smára en hann mun leita sér hjálpar og fer í tímabundið leyfi frá störfum. Hann snýr þó aftur af fullum krafti í haust.

Eiður segir í yfirlýsingunni að ábyrgðin liggi hjá sér og að hann hafi alla sína tíð reynt af bestu getu að vera fyrirmynd en hann sé þó mannlegur.

„Stundum tökum við rangar ákvarðanir, sýnum af okkur dómgreindarleysi og gerum mistök, og þá sérstaklega þegar áfengi spilar inn í,“ segir Eiður.

Hægt er að lesa yfirlýsinguna í heild sinni hér fyrir neðan.

„Vegna umfjöllunar um Eið Smára Guðjohnsen vill KSÍ koma því á framfæri að málefni hans hafa verið í viðeigandi farvegi hjá KSÍ. Eiður Smári hefur fengið skriflega áminningu í tengslum við starfsskyldur sínar hjá KSÍ og fer nú í tímabundið leyfi frá störfum, en mun snúa aftur af fullum krafti með landsliðinu í verkefnum haustsins. KSÍ lýsir yfir stuðningi við Eið Smára og hans ákvörðun um að leita sér hjálpar og óskar honum alls hins besta.“

„Ábyrgðin liggur hjá mér. Ég hef alla tíð reynt af bestu getu að uppfylla það að vera fyrirmynd. Það hlutverk kom til mín og fylgdi sennilega velgengni minni á knattspyrnuvellinum. Það að vera fyrirmynd þýðir ekki að ég sé fullkominn, ég er mannlegur. Stundum tökum við rangar ákvarðanir, sýnum af okkur dómgreindarleysi og gerum mistök, og þá sérstaklega þegar áfengi spilar inn í. Á lífsleið okkar þurfum við öll að taka á ýmsum persónulegum málum, og ég mun svo sannarlega taka á mínum. Alltaf einn af ykkur, Eiður Smári.“