Þorkell Máni Pétursson og Frosti Logason, þáttarstjórnendur Harmageddon, ræddu mál Eiðs Smára í þætti sínum í gær. Hringbraut greindi fyrst frá.

„Eiður Smári verður eitthvað aðeins að fara að huga að þessari drykkju sinni. Það fer rosalega í taugarnar á mér þegar menn eru alltaf eitthvað: „Já, ég skeit á mig, ég var að káfa á þessari konu og er ógeðslegur. Ég vaknaði uppí hjá annarri konu og ég er farinn í meðferð, ég vil biðja alla afsökunar“,“ segir Máni og bætir við að það séu bjánar sem gera þetta.

Frosti er ekki sammála og segir: „Þetta er bara upphafið af því að verða betri maður.“

„Ég held að Eiður kallinn þurfi að fara á snúruna. Með fullri virðingu, fullur í útsendingu. Þú sérð það bara í útsendingunni, hann er ekkert skemmtilegur drukkinn. Ég held að hann ætti að hringja í vini sína og spyrja hvort hann sé skemmtilegur drukkinn. Ef menn segja: „Þú ert ekki skemmtilegur drukkinn kallinn minn,“ þá ætti hann að fara í meðferð,“ sagði Máni.

KSÍ hefur sagt að mál Eiðs séu til skoðunar hjá embættinu en engin yfirlýsing hefur komið um framhaldið. Máni telur að Eiður verði ekki rekinn.

„Hann verður ekkert rekinn. Hvers konar Handmaid‘s Tale, tepruland er þetta ef það kemur: „Landsliðsþjálfari Íslands var rekinn“. Hvað gerði hann? „Hann var að míga á Ingólfstorgi.“ Var hann að gera hvað? Það er of langt gengið.“