Franski framherjinn Kylian Mbappe er einn besti fótboltamaður heims um þessar mundir en hann spilar í heimalandinu með Paris Saint-Germain. Hann er meðal annars þekktur fyrir ansi hraða spretti.
Miðvörðurinn Mats Hummels verður seint talinn sá hraðasti í bransanum og þurfti hann að hafa sig allan við þegar Mbappe tók á rás í leik Þýskalands og Frakklands í gær. Mbappe hljóp af stað eftir skemmtilega hælsendingu frá Karim Benzema en þegar hlaupið hófst var hann dágóða vegalengd fyrir aftan Hummels.
Það virtist skipta hann litlu máli því það tók hann enga stund að ná Þjóðverjanum. Hummels náði þó að trufla hann aðeins og svo tækla boltann í burtu. Mbappe vildi fá dæmda vítaspyrnu eftir tæklinguna en fékk ósk sína ekki uppfyllta.