Ben White, miðvörður Brighton, er orðinn eitt af helstu skotmörkum Arsenal í félagaskipaglugganum í sumar. David Ornstein greinir frá þessu á The Athletic. 

White átti flott tímabil með Brighton í ensku úrvalsdeildinni á síðustu leiktíð. Hann var verðlaunaður með sæti í enska landsliðshópnum á Evrópumótinu. Hann kom að vísu seint inn í hópinn í stað hins meidda Trent Alexander-Arnold.

Arsenal hefur ekki sett sig í samband við Brighton enn sem komið er. Það er þó líklegt að það breytist á næstunni.

Þrátt fyrir að samningur White renni ekki út fyrr en árið 2024 er Brighton opið fyrir því að selja hann fyrir rétt verð. Það gæti verið 40 til 50 milljónir punda.

Mikel Arteta, stjóri Arsenal, vill sækja miðvörð sem getur leikið hægra megin í vörninni.

Arsenal átti vonbrigðatímabil, endaði í áttunda sæti og leikur ekki í Evrópukeppni á næstu leiktíð. Það er ljóst að það þarf að styrkja liðið, ætli það sér stærri hluti næsta vetur.