Arsene Wenger telur að Englendingar séu með það lið sem geti helst ógnað Frökkum á Evrópumótinu í knattspyrnu sem hefst næsta föstudag. Hann varar þó við því að lið Frakka hafi ekki enn toppað.
Frakkland vann Heimsmeistaramótið árið 2018 sem haldið var í Rússlandi. Frakkar eru í 2. sæti á styrkleikalista FIFA en Belgar verma toppsætið. Frakkar unnu Belgíu í undanúrslitum á HM 2018.
Wenger telur að franska liðið geti enn bætt sig enda er liðið skipað af mörgum ungum leikmönnum.
„Þeir eru ekki líklegastir til þess að vinna mótið, þeir eru langlíklegastir. Ef þú vinnur Heimsmeistaramótið og ert með (N’Golo) Kante, (Paul) Pogba, (Karim) Benzema, (Antoine) Griezmann, (Kingsley) Coman, (Olivier) Giroud og fleiri í liðinu þá er ekki hægt að halda öðru fram,“ sagði Wenger í viðtali.
„Á bekknum verða 11 leikmenn sem myndu byrja í nánast öllum öðrum landsliðum.“
„Ég tel að enska liðið geti helst ógnað Frökkum. Þeir hafa marga hæfileikaríka leikmenn. Sumir eru enn ungir en með Mason Mount, Phil Foden, Jack Grealish og auðvitað Harry Kane ásamt reynsluboltanum Henderson, þá geta þeir keppt við Frakka.“
Frakkar hefja leik gegn Þýskalandi á EM 15. júní en England spilar gegn Króatíu 13. júní.
