Ibrahima Konate varnarmaður RB Leipzig hefur lokið læknisskoðun hjá Liverpool og á aðeins eftir að kvitta undir fimm ára samning sinn. ESPN segir frá.
Konate mun ekki skrifa undir hjá Liverpool fyrr en í byrjun júní þegar EM U21 árs landsliðsins er á enda en þar verður Konate í fullu fjöri með Frakklandi.
Kaupin hafa legið í loftinu síðustu vikur en nú þegar tímabilið er búið ætlar Liverpool að ganga frá öllu. Konate hefur náð samkoulagi við Liverpool um kaup og kjör og mun hann skrifa undir fimm ára samning við félagið.
Konate fagnaði í gær 22 ára afmæli sínu en Liverpool þarf að borga 41,5 milljón evra fyrir varnarmanninn, slík klásúla er í samningi hans við Leipzig.
Konate er franskur varnarmaður en honum er ætlað að mynda öflugt par með Virgil van Dijk varnarmanni félagsins. Van Dijk er að jafna sig eftir meiðsli líkt og Joel Matip og Joe Gomez, erfitt hefur verið að treysta á Matip og Gomez síðustu ár vegna meiðsla.
