Octavio Paez, leikmaður Leiknis Reykjavík, fékk verðskuldað beint rautt spjald í 3-0 tapi gegn KA í gær. Brotið var ansi ljótt. Paez fór, undir lok leiks, í glórulausa tveggja fóta tæklingu Kára Gautasyni á vallarhelmingi KA þegar lítið var um að vera. Brotið leit ansi illa út en leikurinn fór fram á Dalvík.
Myndbrot af atvikinu hefur verið birt á Twitter. Undir færsluna skrifar einn notandi ,,Þetta er líkamsárás.“ Það lýsir brotinu þokkalega vel.
Hér fyrir neðan má sjá atvikið.
Allt annað en svona 5 leikja bann er galið.. hvað er i gangi !? #fotboltinet pic.twitter.com/nuNNMqW60y
— Árni Eyjólfsson (@ArniBragi) May 12, 2021
Rætt var um málið á Stöð2 Sport í gær. „Þetta var það sem hann ákvað að koma með að borðinu, þetta er eins mikið rautt og það verður. Hann fær að hvíla sig í næstu umferð og kannski eitthvað meira. Vonandi mest reiður sjálfum sér,“ sagði Guðmundur Benediktsson um málið.
Reynir Leósson var sérfræðingur í setti og hafði þetta að segja. „Það má engu muna þarna, þetta vill enginn sjá. Þarna ertu að fara inn til að meiða einhvern illa“
Jón Þór Hauksson fyrrum landsliðsþjálfari veit ekki hvað Octavio gekk til. „Staðan er 3-0 fyrir KA og eru átta mínútur, hvað gekk honum til? Þetta er hræðilegt.“
