Nokkrir Íslendingar léku erlendis í kvöld. Hér má lesa stutta yfirferð:
Stefán Teitur Þórðarsson var í byrjunarliði Silkeborg og spilaði 80 mínútur í 3-3 jafntefli gegn Viborg í dönsku B-deildinni. Bæði lið höfðu þegar tryggt sér sæti í úrvalsdeild fyrir leikinn í kvöld.
Alfons Sampsted spilaði allan leikinn í 0-2 sigri Noregsmeistara Bodo/Glimt á Kristiansund í norku Eliteserien. Brynjólfur Willumsson spilaði síðustu 20 mínúturnar með Kristiansund. Meistararnir eru með fullt hús eftir tvo leiki en Kristiansund er án stiga.
Viðar Örn Kjartansson spilaði tæpar 80 mínútur með Valarenga í sömu deild. Lið hans vann Brann, 0-3. Valarenga er með 4 stig eftir tvo leiki.
Í sænsku úrvalsdeildinni spilaði Kolbeinn Sigþórsson allan leikinn fyrir Gautaborg í markalausu jafntefli gegn Kalmar. Gautaborg er með 7 stig eftir sex leiki.
Jón Guðni Fjóluson spilaði þá allan leikinn í öftustu línu hjá Hammarby í 1-3 sigri á Varbergs í sömu deild. Lið hans er með 10 stig eftir sex leiki.
Aron Bjarnason, í Sirius, sem og Valgeir Lunddal Friðriksson í Hacken, spiluðu ekki með sínum liðum í kvöld. Hacken tapaði 2-3 fyrir Örebro. Sirius tapaði 0-2 fyrir Elfsborg.
