Ólafur Kristjánsson var rekinn úr starfi sínu hjá Esbjerg í Danmörku í gær. Ólafur tók við liðinu fyrir tæpu ári síðan en mistókst að koma liðinu aftur upp í efstu deild.
Forráðamenn Esbjerg létu Ólaf taka poka sinn í gærkvöldi, skömmu eftir að það var ljóst að félagið kæmist ekik upp.
„Þetta hefur allt farið niður á við eftir góða byrjun, ég veit ekki hvað klikkaði. Kjartan Henry hefur ekki verið heill allt tímabilið, Silkeborg og Vilborg tóku fram úr þeim. Ég veit ekki hvort ég geti ekki bent á eitthvað eitt,“ sagði Ágúst Þór Ágústsson sérfræðingur Dr. Football í þætti dagsins en Ólafur stýrði FH áður en hann tók við Esbjerg.
Hrafnkell Freyr bróðir hans hafði þetat að segja. „Ég heyrði frá mínum manni í Danmörku að þeir væru með gamalt lið sem brann út þegar líða fór á tímabilið, þeir voru farnir að spila mikinn varnarbolta, þeir voru ekki nógu ferskir þegar leið á tímabilið.“
Ágúst veit ekki hvaða skref Ólafur tekur næsta á ferlinum. „Það er góð spurning, ég held að hann komi til Íslands og bíði eftir starfi hérna. Væri ekki Óli fínn að taka við sem yfirmaður knattspyrnumála hjá liði í Danmörku. Ég gæti séð hann taka smá pásu mögulega.“
Staða yfirmanns knattspyrnumála hjá KSÍ er laus í haust og Hrafnkell segir að það starfi gæti hentað Ólafi vel. „Ég held að hann yrði flottur yfirmaður knattspyrnumála hjá KSÍ.“
Hjörvar Hafliðason tók þá til máls og hafði þetta að segja. „Það er misskilningur að hann hafi verið með lang mesta budgetið, það er ekki rétt. Esbjerg hefur verið kaos klúbbur, það hefur mikið gengið á. Þetta er eins og ítalskur fótboltaklúbbur í Danmörku, skipta um þjálfara mjög hratt. Á síðustu fimm árum sjö eða átta þjálfarar. Óli er væntanlega að leita sér að liði núna bara.“
