Inter Milan er í miklum fjárhagsvandræðum þessa stundina og hefur biðlað til leikmanna og starfsliðs um að gefa félaginu launin næstu tvö mánuði.

Inter hefur átt frábært tímabil í ár þar sem liðið varð ítalskur meistari, í fyrsta skipti frá 2010. Liðið hefur ekki enn fengið að lyfta titlinum en stjórn félagsins vill frysta allar launagreiðslur næstu mánuði en félagið er í alvarlegum fjárhagsvanda að sögn Sky Sport á Ítalíu.

Formaður klúbbsins hélt fund með félaginu í morgun til að ræða málin og verður í framhaldinu rætt við hvern og einn leikmann til þess að ræða hlutina betur.

Ef samningar nást við leikmenn mun félagið spara rúmar 25 milljónir evra.

Það hefur verið uppi umræða um það að leikmenn fái ekki bónusgreiðslur fyrir sigurinn í deildinni, en framkvæmdastjóri félagsins, Marotta, staðfesti að bónusarnir verða greiddir.

„Bónusarnir verða greiddir vegna þess að þeir eiga það skilið eftir þetta afrek. En ég get staðfest að samtöl við leikmenn um launamál munu eiga sér stað á næstu vikum vegna fjárhagsvandræða sem COVID-19 hefur skapað,“ sagði Marotta við Sky fyrir leik liðsins um helgina.