Guðmundur Benediktsson, umsjónarmaður Pepsi-Max stúkunnar á Stöð 2 Sport, var í viðtali í Bítinu á Bylgjunni um 1. umferð Pepsi-Max deildar karla sem fór fram um helgina.

Takmarkaður fjöldi áhorfenda má mæta á leiki í Pepsi-Max deildinni sökum takmarkana sem eru í gildi vegna Covid-19 faraldursins.

Samkvæmt núverandi reglugerð mega að hámarki 200 áhorfendur vera á hverjum leik og skal þeim vera skipt upp í tvö sóttvarnarhólf.

Guðmundur var spurður út í þessar takmarkanir í viðtalinu í Bítinu á Bylgjunni.

„Ég held að það sé búið að vera nánast uppselt á alla leikina þar sem að þetta eru allt að 200 manns sem mega mæta á þessa leiki. Mér finnst að það eigi að vera einhvað samkomulag um að það eigi bara að vera háværasta fólkið sem sé í stúkunni,“ sagði Guðmundur í viðtalinu í Bítinu á Bylgjunni.

Núverandi sóttvarnarreglur gilda til 5. maí næstkomandi. Þórólfur Guðnason, sóttvarnarlæknir, hefur skilað minnisblaði til heilbrigðisráðherra þar sem hann leggur til næstu sóttvarnaraðgerðir sem myndu þá taka gildi í kjölfarið. Fróðlegt verður að sjá hvort fleiri áhorfendur geti mætt á leiki í næstu umferð Pepsi-Max deildarinnar eftir að nýjar reglur taka gildi.

Hlusta má á viðtalið við Guðmund Benediktsson hér fyrir neðan.