Inter sigraði botnlið Crotone í ítölsku Serie A í dag. Þá vann AC Milan mikilvægan sigur á Benevento.
Inter er svo gott sem orðið Ítalíumeistari í fyrsta sinn í 11 ár. Þeir mættu liði Crotone í dag sem er langneðst í deildinni. Mörkin létu bíða eftir sér. Daninn Christian Eriksen kom Inter yfir þegar rúmar 20 mínútur lifðu leiks. Achraf Hakimi gulltryggði svo sigurinn í uppbótartíma.
Inter er með 13 stiga forskot á toppi deildarinnar. Þeir geta orðið meistarar á morgun ef Atalanta misstígur sig.
AC Milan tók á móti fallbaráttuliði Benevento. Hakan Calhanoglu kom þeim yfir snemma leiks og bakvörðurinn Theo Hernandez tvöfaldaði svo forystuna í seinni hálfleik.
Milan er í öðru sæti, þó aðeins 3 stigum á undan Juventus sem er í fimmta sæti og á leik til góða. Efstu fjögur liðin fara í Meistaradeildina. Ljóst er að spennan verður mikil á lokakaflanum.
