Chelsea vann öruggan 2-0 sigur á Fulham í leik sem er nýlokið í ensku úrvalsdeildinni. Leikið var á Stamford Bridge.

Chelsea komst yfir strax á 10.mínútu leiksins. Þar var að verki Kai Havertz, sem spilaði sem fremsti maður í dag. Mason Mount gerði vel í aðdraganda marksins, tók vel á móti langri sendingu og renndi boltanum á Havertz.

Hakim Ziyech hefði getað tvöfaldað forystu Chelsea er hann fékk gott færi í fyrri hálfleik sem Areola varði. Þá fékk Fulham einnig sín tækifæri. Staðan í hálfleik þó 1-0 fyrir Chelsea.

Það voru aðeins tæpar 5 mínútur liðnar af seinni hálfleik þegar Havertz var búinn að skora sitt annað mark eftir flott samspil við Timo Werner.

Chelsea var betri aðilinn það sem eftir lifði leiks. Fleiri mörk voru hins vegar ekki skoruð. Lokatölur 2-0.

Chelsea er í fjórða sæti deildarinnar með 61 stig, með 6 stiga forskot á West Ham sem er í fimmta sæti. West Ham á þó leik til góða.

Fulham er svo gott sem fallið. Þeir eru í 18.sæti með 27 stig, 9 stigum frá öruggu sæti og búnir að leika leik meira en Newcastle sem er í sætinu fyrir ofan.