Hansi Flick hefur ákveðið að yfirgefa Þýskalands- og Evrópumeistara Bayern Munchen eftir tímabilið. Flick hefur unnið allt sem hægt er að vinna með Bayern Munchen eftir að hann tók við liðinu í nóvember 2019.
Flick tilkynnti þetta eftir leik Wolfsburg og Bayern Munchen sem Bayern unnu 2-3.
„Ég sagði liðinu í dag að ég hefði tilkynnt stjórn klúbbsins þetta í vikunni eftir leikinn í París um að ég vildi yfirgefa félagið í lok leiktíðar,“ sagði Flick við Sky í Þýskalandi.
„Mér fannst mikilvægt að liðið heyrði þetta frá mér. Ég er mjög þakklátur að hafa fengið að vera hjá þessu liði.“
Bayern hafa verið orðaðir við bæði Nagelsmann og Jurgen Klopp en ljóst er að erfitt verður fyrir liðið að landa þeim.
Líklegasti áfangastaður Hansi Flick er þýska landsliðið. Talið er líklegt að hann taki við því eftir EM í sumar en Joachim Löw mun láta af störfum eftir það mót.
