KSÍ hefur svarað opnu bréfi frá ASÍ þar sem þess var krafist að sambandið mundi beita sér fyrir bættum mannréttindum verkafólks í Katar.
Heimsmeistaramótið í knattspyrnu fer fram í Katar á næsat ári. Greint hefur verið frá því að tæplega 6500 verkamenn hafi látið lífið við að byggja upp vellina í Katar til að halda mótið.
Yfirlýsing KSÍ.
KSÍ er aðili að FIFA eins og önnur knattspyrnusambönd og landslið Íslands eins og annarra þjóða taka þátt í mótum á vegum FIFA. FIFA fylgist grannt með uppbyggingu vegna HM 2022 og er þannig fulltrúi aðildarþjóða sinna gagnvart yfirvöldum í Katar og skipuleggjendum keppninnar.
KSÍ er meðvitað um stöðu mála gagnvart HM 2022 í Katar og umfjöllun um aðbúnað verkafólks við uppbyggingu mannvirkja. KSÍ hefur átt í samskiptum við FIFA og önnur knattspyrnusambönd vegna þessa.
Aðaláhersla KSÍ í þessu sambandi undanfarin ár hefur verið þátttaka í sérstökum vinnuhóp knattspyrnusambanda á Norðurlöndunum þar sem fjallað er um málefni tengd HM í Katar – málefni eins og mannréttindi, aðbúnað verkamanna, kynjajafnrétti og fleira. Í vinnuhópnum er farið yfir sameiginleg samskipti og upplýsingaöflun knattspyrnusambanda Norðurlandanna gagnvart knattspyrnuyfirvöldum í Katar og FIFA. Vinnuhópurinn skipuleggur m.a. heimsóknir til Katar þar sem aðstæður eru skoðaðar, rætt við skipuleggjendur keppninnar og við verkamenn. Í undirbúningi er heimsókn síðar á árinu 2021.
Það er og hefur verið mikill þrýstingur á FIFA og á yfirvöld í Katar vegna mannréttindamála. Sá þrýstingur mun halda áfram og hann á að halda áfram. Keppnin sjálf og kastljós heimsbyggðarinnar setur þrýsting á yfirvöld í Katar að skoða mannréttindamál í víðu samhengi og vinna að úrbótum. KSÍ mun halda áfram að leggja lóð sín á vogarskálarnar í þeim efnum.
FIFA hefur unnið að umbótum á umsóknarferli fyrir lokakeppnir og kröfur til umsækjenda eru mun ríkari í dag en þær voru á þeim tíma sem samþykkt var að halda lokakeppni HM 2022 í Katar, kröfur sem m.a. snúa að uppbyggingu mannvirkja og aðbúnaði þess fólks sem starfar við þá uppbyggingu. Lykilbreyting í þessu sambandi er að aðildarsambönd FIFA munu greiða atkvæði þegar kemur að vali á mótshaldara, í stað valnefndar FIFA áður.
