Neymar, einn af stjörnuleikmönnum Paris Saint-Germain, hefði getað farið í ensku úrvalsdeildina árið 2010 og leikið fyrir Chelsea. Þetta segir fyrrum umboðsmaður hans, Wagner Ribeiro. Hann segir leikmanninn sjálfan hins vegar hafa hafnað skiptum til Englands.

Neymar var á þessum tíma 17 ára og spilaði með Santos í Brasilíu.

,,Þeir (Chelsea) buðu honum mikinn pening en Neymar vildi ekki fara,“ sagði Ribeiro við L’Equipe.

Eftir að hafa hafnað enska liðinu spilaði Neymar í þrjú ár til viðbótar fyrir Santos áður en hann samdi við Barcelona árið 2013. Þaðan fór hann svo fjórum árum seinna, til PSG, fyrir metfé.

Ribeiro bætti einnig við að Neymar hefði getað valið erkifjendur Barca, Real Madrid, á sínum tíma.

,,Florentino (Perez, forseti Real) hélt að hann væri með hann. Hann samþykkti tilboð sem ég bauð honum. Hann var til í að borga 40 milljónir (evra) til Santos og gefa okkur það sem við vildum.“

Á endanum var það svo Neymar sjálfur sem kaus Barcelona frekar.