AGF tók á móti Midtjylland í dönsku úrvalsdeildinni í dag. Leiknum lauk með 4-1 sigri Midtjylland sem komst með sigrinum á toppinn í dönsku úrvalsdeildinni.
Frank Onyeka, kom Midtjylland yfir með marki á 16. mínútu. Hann þurfti hins vegar að fara af velli á 25. mínútu vegna meiðsla og Mikael Neville Anderson kom inn í hans stað.
Alexander Scholz, fyrrverandi leikmaður Stjörnunnar tvöfaldaði síðan forystu Midtjylland með marki á 53. mínútu.
Patrick Mortensen minnkaði muninn fyrir AGF með marki á 61. mínútu og fjórum mínútum síðar kom Jón Dagur Þorsteinsson, inn sem varamaður í liði AGF.
Það var síðan Mikael Neville sem bætti við þriðja marki Midtjylland á 84. mínútu.
Evander innsiglaði síðan 4-1 sigur Midtjylland með marki á 89. mínútu eftir stoðsendingu frá Pione Sisto.
Midtjylland er eftir leikinn í 1. sæti deildarinnar með 92 stig, tveimur stigum meira en Bröndby sem situr í 2. sæti. AGF er í 3.sæti með 76 stig.
