Fjórum leikjum er nýlokið í þýsku Bundesligunni. Bayern missteig sig á heimavelli og Leipzig nýtti sér það til að hleypa lífi í toppbaráttuna.
Bayern Munchen missteig sig á heimavelli gegn Union Berlin. Jamal Musiala kom þeim yfir á 68.mínútu en Marcus Ingvartsen jafnaði fyrir Union seint í leiknum. Úrslitin hleypa aukinni spennu í toppbaráttuna í Bundesligunni þar sem RB Leipzig vann á sama tíma sinn leik.
Leipzig heimsótti Werder Bremen og lenti ekki í vandræðum. Þeir komust í 0-3 í fyrri hálfleik. Dani Olmo skoraði eitt mark og Alexander Sorloth tvö. Milot Rashica minnkaði muninn fyrir Werder úr víti eftir um klukkutímaleik en Marcel Sabitzer innsiglaði 1-4 sigur Leipzig tveimur mínútum síðar. Leipzig er nú með 60 stig í öðru sæti, 5 stigum á eftir Bayern. Werder er 5 stigum fyrir ofan fallsvæðið og gæti sogast í fallbaráttuna af alvöru, vinni Mainz og Köln sína leiki í umferðinni.
Franfurt vann Wolfsburg 4-3 í skemmtilegum leik. Wolfsburg átti fleiri marktilraunir og voru meira með boltann en það dugði ekki til. Frankfurt er áfram í fjórða sæti, nú aðeins stigi á eftir Wolfsburg, sem er í því þriðja.
Þá gerðu Hertha Berlin og Gladbach 2-2 jafntefli. Hertha er í mikilli fallbaráttu en Gladbach er að berjast um Evrópusæti.
