Virgil Van Dijk, leikmaður Liverpool, er staðráðinn í því að spila með Hollandi á Evrópumótinu í sumar. Þetta herma heimildir Mirror í Hollandi.

Van Dijk hefur verið frá síðan í október eftir að hafa meiðst á hné í leik gegn Everton í ensku úrvalsdeildinni.

Heimildarmenn Mirror í Hollandi herma að Van Dijk sé með augastað á Evrópumótinu í sumar fyrir endurkomu á knattspyrnuvöllinn og að hann hafi ekki gefið það upp á bátinn að spila með hollenska landsliðinu á mótinu sem fer fram dagana 11. júní – 11. júlí.

Jurgen Klopp, knattspyrnustjóri Liverpool, hafði áður sagt að það væri ólíklegt að Van Dijk gæti tekið þátt í mótinu.

„Van Dijk er farinn að hlaupa en þetta er erfið staða. Það er ekki það að ég vilji ekki leyfa þeim að fara á mótið, þetta snýst allt um umfang þeirra meiðsla. Við vonumst til þess að þeir verði klárir á undirbúningstímabilinu fyrir næsta tímabil. Þetta eru alvarleg meiðsli og nú er ekki tímapunkturinn til þess að ræða hvort þeir geti tekið þátt í einstaka keppnum,“ sagði Jurgen Klopp, knattspyrnustjóri Liverpool, á dögunum um meiðsli Van Dijk og Joe Gomez, leikmanna Liverpool.

Viljinn hjá þjálfarateymi hollenska landsliðsins á að fá Van Dijk í landsliðshópinn fyrir mótið, er mikill. Heimildir Mirror herma að Frank De Boer, landsliðsþjálfari Hollands, sé búinn að lofa Van Dijk sæti, verði hann heill.

Sú hugmynd um að Van Dijk komi beint úr endurhæfingu og spili með Hollandi á Evrópumótinu, er líklegast eitthvað sem þjálfara- og læknateymi Liverpool eru ekki hrifin af.

Raymond Verheijem, sem hefur starfað sem sjúkraþjálfari hjá  velska og hollenska landsliðinu segir að Van Dijk gæti verið að taka mikla áhættu með því að fara á Evrópumótið.

„Um leið og hann kemst á völlinn með Liverpool, munu dyrnar opnast fyrir Evrópumótið. Ef hann spilar ekkert fyrir mótið verður hann allt í einu kominn í allt aðrar aðstæður hjá Hollandi og það gæti verið áhættusamt,“ sagði Raymond Verheijen.