Óvíst er hvort Gylfi Þór Sigurðsson, Jóhann Berg Guðmundsson, Jón Daði Böðvarsson og Rúnar Alex Rúnarsson verði með íslenska landsliðinu gegn Þýskalandi í næstu viku.

Arnar Þór Viðarsson landsliðsþjálfari valdi sinn fyrsta landsliðshóp í dag, ástæðan eru COVID tengdar og ferðatakmarkanir á milli landa.

Smelltu hér til að sjá hóp Arnars

„Áskorunin í þessu öllu er COVID tengt, það er ennþá spurningarmerki með Þýskaland. Hvort leikmenn sem spila á Bretlandseyjum, hvort þeir fái að koma inn til Þýskalands. Við bíðum eftir svörum frá UEFA Og þýskum yfirvöldum, það er í rauninni stærsti óvissuþátturinn,“ sagði Arnar Þór eftir að hafa kynnt hóp sinn.

U21 árs landsliðið er á leið á EM í næstu viku og óvíst er hvort hópurinn sem kynntur var í gær sé endanlegur.

„Það tengist niður í U21 árs landsliðið, í rauninni höfum við tekið þá ákvörðun og tókum hana snemma. Að reyna að sjá til þess að allir þessi efnilegu leikmenn sem komust á lokakeppninni að flestir taki þátt í henni. Það er mikilvægt fyrir okkur, við teljum það sem starfsliði hjá A-liði karla og U21. Við teljum það mikilvægt ef það hindrar ekki A-karla, við reynum að vinna þetta eins vel og við getum við Davíð Snorra og hans teymi.

„Ef að það verður þannig að Þýskaland opnast ekki fyrir okkar leikmenn á Bretlandseyjum, þá munum við að öllum líkindum taka leikmenn úr U21 árs landsliðinu fyrir Þýskalands leikinn. Það svarar all mörgum spurningum, staðan er sú sama. Það getur komið upp sú staða að við færum U21 leikmenn í A-hópinn, þegar við fáum svör frá Þýskalandi,“ sagði Arnar.

Arnar hefur rætt um málið við Jóhann Berg og Gylfa Þór. „Þeir eru að bíða eftir svörum eins og við öll hin, það góða við þessa leikmenn er að þeir hafa reynslu. Þeir gera sér grein fyrir því að þeir hafa ekkert um þetta að segja, þetta eru aðstæður sem við höfum ekki stjórn á.“