Norski framherjinn Erling Håland hefur farið hamförum með Borussia Dortmund á tímabilinu en hann hefur skorað 31 mark í 30 leikjum í öllum keppnum, þar af tíu mörk í sex leikjum í Meistaradeildinni.
Håland, sem keyptur var til Dortmund frá RB Salzburg í janúar 2020 á 20 milljónir punda, er einn eftirsóttasti leikmaður heims, enda aðeins tvítugur að aldri að raða inn mörkum í einni helstu deild heims. Hann er metinn á yfir 110 milljónir evra.
Manchester United eru eitt af þeim liðum sem hafa hvað mestan áhuga á framherjanum, en samkvæmt 101greatgoals eru fjórir leikmenn sem þeir þurfa að selja til að geta keypt framherjann.
Anthony Martial
Fyrsti leikmaðurinn sem United þurfa að selja er franski framherjinn Anthony Martial. Það yrðu ekki mikil not fyrir þennan 25 ára leikmann á Old Trafford ef Håland kæmi til liðsins og því kjörið að reyna að fá smá pening fyrir hann á meðan hægt er. Martial hefur átt erfitt með að skora á tímabilinu en hann hefur skorað aðeins fjögur mörg í 22 leikjum í ensku úrvalsdeildinni.
Donny van de Beek
Manchester United fjárfesti í þessum unga hollenska miðjumanni í sumarglugganum í fyrra á 35 milljónir punda. Van de Beek hefur ekki fengið mörg tækifæri eftir komu hans frá Ajax en hann hefur iðulega komið inn á af bekknum en er lítið í byrjunarliðinu hjá Ole Gunnar Solskjær. Hann er samningsbundinn félaginu til ársins 2025 en United fær meira út úr því að selja hann en að neyða hann í annað tímabil sem varaskeifa Bruno Fernandes.
Jesse Lingard
Jesse Lingard er uppalinn hjá Manchester United og spilað með aðalliðinu í mörg ár. Hann hefur þó haft það erfitt bæði innan og utan vallar seinustu tvö tímabil en eftir að hann var lánaður til West Ham United í janúar þá hefur honum tekist að koma sér aftur á strik. Lingard á rúmlega eitt ár eftir af samningi sínum hjá United og því þarf annað hvort að selja hann í sumar eða framlengja við hann til að hægt sé að fá pening fyrir hann. Talið er að hann sé til sölu á um 20 milljónir punda en gott gengi hans hjá West Ham hefur hækkað verðmiða hans ágætlega. Hann hefur skorað fjögur mörk og lagt upp eitt annað í aðeins sex leikjum á tímabilinu.
Brandon Williams
Seinasti maðurinn á lista 101greatgoals er vinstri bakvörðurinn Brandon Williams. Williams er afar efnilegur en í augnablikinu er hann þriðji maðurinn í stöðuna á eftir þeim Luke Shaw og Alex Telles sem keyptur var seinasta sumar. Williams spilaði þó nokkra leiki á seinustu leiktíð en hefur aðeins fengið sjö mínútur af spilatíma það sem af er á þessari leiktíðí ensku úrvalsdeildinni. Hann stóð sig vel fyrri hluta seinasta tímabils en gengi hans fór að dvína þegar leið á tímabilið.
