Antonio Cassano fyrrum landsliðsmaður Ítalíu hjólar í Cristiano Ronaldo og segir hann eigingjarnan, Cassano segir að það sé erfitt fyrir Andrea Pirlo að breyta hlutum hjá Juventus vegna Ronaldo.

Ronaldo og félagar í Juventus eru í klípu, liðið situr í fjórða sæti í deildinni og virðist í fyrsta sinn í mörg ár ekki líklegt til að vinna deildina.

Liðið átti svo slakan leik gegn Porto í gær og tapaði 2-1 á útivelli, óvænt tap og liðið upp við vegg fyrir seinni viðureignina.

„Ég hef alltaf sagt það, sú staðreynd að hann er einstakur og hefur raðað inn mörkum gat alltaf orðið vandræði fyrir Pirlo,“ sgaði Cassano en Pirlo tók við Juventus fyrir tímabilið, hans fyrsta alvöru starf í leiknum.

„Hann skorar mark í leik, það er staðreynd. En hann er í vandræðum með hugmyndir Pirlo, hann hefur alltaf verið aðeisn of eigingjarn. Honum er sama þegar aðrir skora, hann er maðurinn sem lifir fyrir að skora.“

„Hann lifir ekki fyrir frábæran leik, hann lifir fyrir augnablikið að skora. Juventus er að reyna að breyta hugmyndum sínum og fótboltanum en það gæti verið erfitt með Ronaldo.“