Ótrúlegur viðsnúningur hefur orðið í rekstri á knattspyrnudeild ÍA á síðasta ári, árið 2019 var gríðarlegt tap á rekstri knattspyrnudeildar ÍA.
Skagamenn höfðu tapað 62 milljónum króna á árinu 2019 og mikið var fjallað um slæmt ástand félagsins. Geir Þorsteinsson, fyrrum formaður KSÍ var ráðinn framkvæmdarstjóri ÍA á síðasta ári. Geir virðist hafa unnið kraftaverk í að snúa rekstri félagsins við.
Tekjur knattspyrnudeildar ÍA voru 210 milljónir á síðasta ári og var hagnaður rúmar 2,7 milljónir íslenskra króna.
Skagamenn seldu leikmenn fyrir 27 milljónir á síðasta ári en Bjarki Steinn Bjarkason var seldur til Venezia á Ítalíu. Skagamenn fengu meira frá styrktaraðilum á árinu 2020 en árið á undan.
COVID hafði þó áhrif á reksturinn en tekjur af miðasölu lækkuðu um tæpar 7 milljónir, úr 12 milljónum frá 2019 niður í 5 milljónir árið 2020.
Ársreikning Skagamanna má lesa hérna í heild.
