Erling Braut Håland, framherji Borussia Dortmund, er einn eftirsóttasti leikmaður Evrópu um þessar mundir. Norðmaðurinn hefur verið orðaður við stórlið í álfunni en vefsíðan FourFourTwo, bendir einnig á áhugaverð tengsl kappans við Leeds United.
Håland fæddist í Leeds, á þeim tíma spilaði faðir hans með félaginu og tengsl fjölskyldunnar við borgina og félagið eru sterk. Alf-Inge Rasdal Håland, spilaði 74 leiki fyrir Leeds United á sínum tíma og skoraði 8 mörk.
Í viðtali við norska blaðið Aftenposten, sagði þá 16 ára gamall Erling Braut Håland frá draumum sínum.
„Draumurinn er að vinna ensku úrvalsdeildina með Leeds. Að auki er það markmið að verða betri en pabbi í knattspyrnu, spila fleiri leiki en hann,“ sagði Håland á sínum tíma.
Leeds United er nú aftur komið í ensku úrvalsdeildina eftir margra ára fjarveru. Þó að það verði að teljast ólíklegt að Håland gangi til liðs við Leeds United þegar að félög á borð við Manchester City, Juventus og Barcelona eru á eftir honum, verður það að teljast ansi rómantísk saga ef Norðmaðurinn myndi spila þar.
