Thomas Partey miðjumaður Arsenal hefur ekki náð flugi með sínu nýja félagi vegna meiðsla sem hrjáð hafa hann frá því að hann gekk í raðir félagsins. Arsenal borgaði 45 milljónir punda fyrir Partey þegar hann kom frá Atletico Madrid.
Partey er frá Ghana en hann ræddi lífið þar við fréttamenn og hvernig það gekk fyrir sig á hans yngri árum.
Partey sagði frá því að til að heilla stelpur í heimalandi hans, þarf að kaupa núðlur fyrir þær. Þær taka ekki við hverju sem er og vilja helst fá Indomie núðlurnar.
„Þú finnur þér nýja stelpu í Ghana og hún suðar í þér að kaupa Indomie. Alla daga biðja þær um Indomie,“ sagði Partey og hafði gaman af því að segja þessa sögu.
„Matur fyrir stelpur tók alla mína peninga á mínum yngri árum, þær tæma peningana hjá öllum strákunum í Ghana.“
„Allar bragðtegundir eru góðar, kannski ætti ég að verða sendiherra fyrir Indomie. Þá fæ ég þetta frítt.“
