Marcus Rashford sóknarmaður enska landsliðsins hefur barist við yfirvöld í Bretlandi um að gefa börnum að borða sem búa við fátækt. Rashford hefur látið í sér heyra um að börn sem fá máltíðir í skólum verði einnig að fá að borða þegar frí er í skólum.

Vetrarfrí er í skólum Bretlands á næstunni og hefur Rashford haft miklar áhyggjur af því að fjöldi barna fái ekki mat á þeim tíma. Hann grátbað stjórnvöld um að tryggja þeim máltíðir en þingið í Bretlandi hafnaði því.

Rashford hefur því tekið málin í sínar hendur og hefur fengið veitingastaði út um allt Bretland til að bjóða upp á fríar máltíðir fyrir börn sem lifa við fátækt.

Framherjinn gengur hart fram enda þekkir hann það á eigin skinni að vera ungur og svangur. „Börnin eru ekki bara svöng, þau fara líka að efast um eigið ágæti,“ sagði Rashford þegar hann reyndi að sannfæra stjórnmálamenn um það rétta í stöðunni.

Talið er að 1,4 milljón barna í Bretlandi þurfi aðstoð við það að fá mat á disk sinn. Rashford ólst upp í Wythenshawe í Manchester þar sem mikil fátækt er.

Móðir hans Mel var einstæð og átti fimm börn, hún var í fullri vinnu en það komu ekki inn nægir fjármunir svo að allir gætu fengið að borða öllum stundum. „Ég man eftir því að vera svangur,“ sagði Rashford.

„Ég vissi vel að mamma lagði allt á sig, ég kvartaði aldrei. Ef það var matur til, þá var matur. Ef það var ekki til peningur fyrir mat þá átti ég vini þar sem ég gat mögulega fengið að borða.“

Rashford segir að það sé mikilvægt fyrir sig að nota rödd sína sem einn þekktasti knattspyrnumaður Bretlands. „Þetta er mér mjög mikilvægt, ég veit hvað fjölskyldur eru að ganga í gegnum. Ég var í þessum sömu sporum og það er erfitt að komast úr þeim.“