Íslenska landsliðið reið ekki feitum hesti gegn Dönum í Þjóðadeildinni þegar leikið var á Laugardalsvelli í kvöld. Ísland tapaði 3-0 og átti aldrei möguleika í leiknum.

Alfreð Finnbogason fór meiddur af velli snemma leiks og Danir skoruðu svo sitt fyrsta mark undir lok fyrri hálfleiks. EKki er öruggt að boltinn hafi farið inn en mistökin sem Hannes Þór Halldórsson gerði í aðdraganda þess voru dýr.

Botninn hrundi svo úr leik Íslands í síðari hálfleik. Aðstoðardómarinn taldi sig hafa séð boltann inni í fyrsta markinu, eitthvað sem er nánast ómögulegt.

„Þetta eru ljótar tölur, við vorum að mæta frábæru liði. Þeir áttu ekki færi í fyrri hálfleik, svo fá þeir þetta mark. Það kemur á hræðilegum tíma fyrir okkur, við köstum leiknum svo frá okkur í upphafi seinni hálfleiks,“ sagði Hannes Þór Halldórsson um leikinn á Stöð2 Sport í kvöld.

Hannes telur að boltinn hafi ekki farið inn. „Ég upplifði ekki að hann væri inni, hann er hálfur inni en ég næ að skófla honum út. Það er ekki fræðilegur að hann hafi séð þetta, höndin mín er fyrir sjónarhorni línuvarðarins.“