Íslensk knattspyrna hefur fengið að finna fyrir áhrifum kórónuveirunnar undanfarið en bannað hefur verið að stunda íþróttir sem ekki falla innan tveggja metra reglunnar. Á föstudaginn mun það þó breytast og geta knattspyrnuleikir því hafist að nýju.

Heilbrigðisráðuneytið greindi frá þessu í tilkynningu sem birt var í dag. KSÍ hefur undanfarna viku verið að undirbúa endurkomu knattspyrnunnar og var vonast til þess að hægt væri að spila á föstudaginn. Með þessari tilkynningu heilbrigðisráðherra er staðfest að það megi.

„Þrátt fyrir meginregluna um 2 metra nálægðartakmörkun verða snertingar heimilar milli íþróttafólks á æfingum og í keppnum,“ segir í tilkynningunni. „Aftur á móti skal virða 2 metra regluna í búningsklefum og á öðrum svæðum utan keppni og æfinga. Aðrir, meðal annars þjálfarar, starfsmenn og sjálfboðaliðar, skulu ávallt virða 2 metra regluna. Íþrótta- og ólympíusamband Íslands skal setja sérsamböndum sínum nánari reglur í samráði við sóttvarnalækni, meðal annars um einstaklingsbundnar sóttvarnir, sótthreinsun búnaðar, framkvæmd æfinga og keppna.“