Svona hefst bakvörður sem Jóhann Ingi Hafþórsson skrifar og birtist í Morgunblaðinu í dag. Þar fjallar hann um áhrif COVID-19 veirunnar á íslenska knattspyrnu en KSÍ staðfesti á fimmtudag að öllum leikjum frá föstudeginum 31. júlí til og með 5. ágúst yrði frestað og síðan yrði staðan. endurskoðuð. „Ekki er vitað hve lengi núverandi ástand varir, en ljóst er að KSÍ má ekki við því að fresta Íslandsmótum sínum of lengi, ætlum við yfir höfuð að ná að klára þau,“ segir Jóhann.
Á fimmtudag fóru leikir fram í Mjólkurbikar karla án áhorfenda og segir Jóhann að auðvitað sé það afar leiðinlegt að geta ekki mætt á völlinn að styðja sitt lið. „Ég tel það samt sem áður ágæta lausn á þessum tímapunkti að spilað verði áfram án áhorfenda, fyrst um sinn, á meðan við náum betur utan um stöðuna sem komin er upp hér á landi.“
Þá segir Jóhann að erfitt sé að gera sér grein fyrir því hve lengi ástandið verður svona. „En til þess að klára Íslandsmótin verðum við fara aftur af stað sem fyrst. Við megum ekki við mikið frekari frestunum,“ segir hann.
„Íslenskt veðurfar setur auðvitað strik í reikninginn og ekki förum við að spila á Íslandsmóti um hávetur. Ég hugsa að nánast allir leikmenn, þjálfarar og stuðningsmenn séu sammála um að það yrði betra að spila án áhorfenda í einhvern tíma. Verður þá hægt að klára mótið, frekar en að aflýsa því, líkt og gerðist í handboltanum, körfuboltanum og fleiri íþróttum síðasta vetur. Vonandi fáum við fótboltann á fullt aftur sem fyrst.“