Emma Louise Jones var aldrei mikið fyrir fótbolta en í dag er hún ein vinsælasti lýsandi Leeds United TV. Á dögunum tryggði Leeds sér sæti í efstu deild Englands og mun Emma fylgja liðinu þangað. The Sun greinir frá þessu.

Emma tekur viðtöl bæði fyrir og eftir leiki fyrir LUTV auk þess sem hún vinnur á BBC Radio og heldur úti hlaðvarpi. Hún hefur náð miklum árangri í starfi síðan hún byrjaði en það er aðdáunarvert í ljósi þess að hún horfði aldrei á fótbolta áður en hún byrjaði. „En síðan ég byrjaði hjá Leeds þá er ég orðin aðdáandi!“ sagði Emma í viðtali við tímaritið Ourtown. „Stemningin, ástríðan og spennan hefur haft mikil áhrif á mig og nú er ég háværasti áhorfandinn á setti.“

Áður en Emma hóf störf hjá LUTV hafði hún bakgrunn í fjölmiðlun en hún viðurkennir að henni fannst það erfitt að spyrja viðmælendur að erfiðum spurningum. Hún segir að einu sinni hafi hún farið að gráta með viðmælanda en svoleiðis vandamál hafa ekki komið upp hjá Leeds, sérstaklega ekki á þessu tímabili. Hún segist vera mjög heppin með að hafa fengið starfið þar sem það var alltaf hennar draumur að vera í sjónvarpi.

Árið 2016 varð Emma fyrir auðkennisþjófnaði. Hún komst að því að fólk væri að nota myndir af henni til að setja upp falska aðganga á stefnumótasmáforritinu Tinder. Þar var hún meðal annars sögð heita Anna og að hún ynni í matvöruverslun. Þá var fólk einnig að nota myndir af henni með því yfirskini að hún væri flugfreyja og þjónustustúlka til að komast á stefnumót.