Leikmaður Berserkja varð fyrir rasisma í gær er liðið spilaði við Skallagrím í 4.deild karla hér heima.

Frá þessu greinir Einar Guðnason sem hefur leikið með liðinu síðan 2007 og einnig séð um þjálfun.

Einar greindi frá því á Twitter að leikmaður Skallagríms hefði látið rasísk ummæli falla í garð leikmanns Berserkja. Leikurinn endaði með 2-0 sigri Skallagríms.

Fótbolti.net ræddi við Viktor Huga Henttinen, aðstoðarþjálfara Berserkja í kjölfarið og fór hann út í frekari smáatriði.

„Ég var á hliðarlínunni og var því ekki í hitanum en það sem strákarnir segja mér og vinir okkar í Skallagrími eru sammála okkur þá varð smá hiti og einhverjar tæklingar. Í kjölfarið snýr leikmaður númer fimmtán í Skallagrími [Atli Steinar Ingason] sér við og segir ‘drullastu heim til Namibíu’ við Gunnar Jökul Johns, leikmann okkar,“ segir Viktor við Fótbolta.net.

,,Kormákur Marðarson, leikmaður okkar, hafði heyrt fimm mínútum áður, sama einstakling númer 15 kalla Gunnar ‘apakött’. Kormákur spurði númer 15 hvað kallaðiru hann og hann endurtók ‘apaköttur’. Þetta er leiðinlegt mál.“

Greint er frá því að atvikið hafi átt sér í byrjun seinni hálfleiks en stuttu seinna var Atli Steinar tekinn af velli.

Það má búast við að KSÍ skoði þetta atvik nánar og á leikmaðurinn vonandi yfir höfði sér refsingu.

Árið er 2020 og leikmaður Skallagríms lét rasísk ummæli falla í garð leikmanns Berserkja í kvöld. Vonandi heldur aganefnd sínu striki og dæmir menn í löng bönn

— Einar Gudnason (@EinarGudna) July 10, 2020