Mikil umræða hefur skapast um ástand Egilshallar og leikvallarins sem þar er eftir að Gunnar Þór Gunnarsson leikmaður KR sleit þar líklega krossband á þriðjudag.
KR skoðar það að fara í skaðabótamál við fasteignafélagið Regins vegna þess að félagið hafi vanrækt skyldu sína við umhirðu á gervigrasinu í Egilshöll. Þetta kemur fram í ítarlegri grein Fréttablaðsins í dag.
Meira:
Skoða að fara í skaðabótamál vegna ástandsins í Egilshöll sem er sagt viðbjóður
Reginn segir þetta tóma þvælu og í yfirlýsingu sem var send fjölmiðlum er þessu vísað á bug. „Gervigrasið í Egilshöll var prófað af viðurkenndri og óháðri rannsóknarstofu um mánaðarmótin febrúar-mars s.l. Niðurstöður prófana sýna að gervigrasið uppfyllir kröfur FIFA Quality og reglugerð KSÍ um knattspyrnuleikvanga. Völlurinn er með samþykkt vallarleyfi frá KSÍ. Viðhaldi er sinnt með reglubundnum hætti á fullnægjandi hátt samkvæmt leiðbeiningum framleiðanda af þjónustuaðila og starfsmönnum Egilshallar. Fullyrðingum um annað er vísað á bug,“ segir í yfirlýsingu frá Reginn.
Yfirlýsing KSÍ
Vegna umfjöllunar um gervigrasvöll Egilshallar í Reykjavík (leikflötinn, vallarleyfi, úttekt og fleira) vill KSÍ koma neðangreindu á framfæri.
Úttekt (prófun) á gervigrasi Egilshallar var framkvæmd 29. febrúar 2020 af Sports Labs Ltd., sem er óháð og viðurkennd rannsóknarstofa sbr. grein 8.4.3 í reglugerð KSÍ um knattspyrnuvelli. Vottun var útgefin af Sports Labs Ltd. og staðfest til KSÍ 6. mars 2020 með þeirri niðurstöðu að gervigrasið í Egilshöll standist settar kröfur.
Vallarleyfi Egilshallar (B-flokkur) var gefið út 26. mars 2020 og gildir til 31. desember 2021. Samkvæmt reglugerð KSÍ um knattspyrnuleikvanga eru vallarleyfi gefin út til allt að tveggja ára í senn.
Þess er auðvitað vænst af öllum hagsmunaaðilum (KSÍ, félögum, iðkendum, þjálfurum og öðrum) að nauðsynlegu viðhaldi sé sinnt á öllum knattspyrnuvöllum, hvort sem um ræðir náttúrulegt gras eða gervigras.
Það sem af er árinu 2020 hafa 42 leikir í meistaraflokki farið fram í Egilshöll (Reykjavíkurmót, Lengjubikar og önnur mót).
Lið dregið sem heimalið skal leika á heimavelli
Í grein 23.2.4 í reglugerð KSÍ um knattspyrnumót kemur fram varðandi bikarkeppni KSÍ að draga skuli um hvaða lið mætist og „skal það lið sem dregið er á undan leika á heimavelli“. Í grein 23.2.6 í sömu reglugerð kemur fram að mótanefnd sé „heimilt í vissum tilfellum að ákveða að leikur fari fram á hlutlausum velli ef rökstudd ósk þess efnis berst frá báðum aðilum sökum fjarlægðar eða annarra ástæðna.“
