Forráðamenn Dortmund segja að Jadon Sancho verði áfram hjá félaginu á næstu leiktíð og fari því ekki til Manchester United eins og rætt hefur verið um.

Sancho hefur verið sterklega orðaður við Manchester United síðustu vikur og mánuði en hann er sagður vilja fara. Kórónuveiran hefur breytt landslagi fótboltans og ekki öruggt að neitt félag geti borgað um 100 milljónir punda fyrir leikmann.

„Það er mikið rætt um Jadon en við höfum rætt þetta og hreinsað loftið. Eins og staðan er í dag vinnum við út frá því að hann verði hér á næstu leiktíð. Það er ekkert til í þessum sögum,“ sagði Sebastian Kehl í stjórn félagsins.

Jadon Sancho var á bekknum hjá Dortmund um helgina en erlendir miðlar sögðu hann vilja fara til Manchester United. Það sem vakti svo athygli er að Sancho setti sjálfur læk við slíka færslu á Twitter.

Kantmaðurinn vill helst koma aftur heim til Englands en málefni hans gætu farið að skýrast nú þegar lítið er eftir af þýsku deildinni.

Sancho tók lækið til baka skömmu síðar enda féll það ekki vel í kramið hjá stuðningsmönnum Dortmund.