Það fór fram stórleikur á Englandi á föstudag er Tottenham tók á móti Manchester United í London. Um var að ræða fyrsta leik liðanna eftir hlé og voru margir búnir að bíða spenntir eftir viðureigninni.

Leikurinn var góð skemmtun en Tottenham komst yfir í fyrri hálfleik með marki frá Steven Bergwijn en hann átti góðan sprett og þrumaði boltanum í netið. Staðan var 1-0 fyrir heimamönnum í hálfleik en það var ekki fyrr en undir lok leiksins sem United tókst að jafna. Paul Pogba féll þá í vítateig Tottenham og nýtti Bruno Fernandes sér það og skoraði úr vítinu.

David De Gea markvörður Manchester United var harðlega gagnrýndur eftir leik og Gary Neville fyrrum fyrirliði félagsins er ekki hrifinn.

„Hann var sá leikmaður sem Manchester United gat treyst á í fjögur ár en það er ekki þannig í dag. Hann hefur ekki verið líkur sér undanfarið, þegar frammistaðan er slök í sex mánuði er það tímabil sem þú kemst úr. Ef það er í heilt ár, þá hefur þú áhyggjur. Þegar þetta verða tvö ár þá er þetta orðið að vana,“ sagði Neville.

„Svona er De Gea í dag, það er mikið um mistök. Hann hefði ekki gert þau áður, hann var alltaf öruggur. Þetta er sjálfstraustið, þetta er í hausnum á honum.“

Neville telur að frammistaða De Gea á HM í Rússlandi árið 2018 sé stór ástæða þess að hann er ekki sami markvörðurinn i dag. „Hann fékk slæmar móttökur á Spáni, þeir bauluðu á hann. Hann var í vandræðum og hefur ekki verið eins.“

,,Hann þarf að fara aftur á æfingasvæðið, það eina sem hægt er að gera er að æfameira. Hann þarf að koma fyrstur inn og fara síðastur.“