Það að hitta Roy Keane á förnum vegi kostaði Peter Crouch rúmar fjórar milljónir. Crouch rakst á Keane á nýrri glæsikerru.
Crouch var þá leikmaður Liverpool en Keane var fyrirliði Manchester United. Framherjinn stóri ákvað að kaupa sér Aston Martin bíl en leið ekki vel í honum.
„Þetta var ekki ég en ég hafði eytt miklum pening í þennan bíl og varð að nota hann. Ég var með höndina út um gluggann, sólgleraugu og tónlist í botni,“ sagði Crouch.
„Ég hélt að ég væri alveg með þetta, svo lendi ég við hlið Roy Keane á ljósi. Hvernig hann horfði á mig, ég hef aldrei verið jafn lítill í mér.“
„Hann heilsaði ekki, hann bara keyrði í burtu. Ég horfði á sjálfan mig og hugsaði að ég væri búinn að missa það. ÉG seldi bílinn og tapaði 25 þúsund pundum á honum.“
