Guðjón Pétur Lýðsson, miðjumaður Breiðabliks ætlar að troða sokk ofan í kok þeirra sem hafa ekki trú á sér í sumar. Í Dr. Football og upphitun fyrir Pepsi Max-deildina á Stöð2 Sport er því spáð að Guðjón Pétur Lýðsson verði á bekknum í Kópavogi.

Rætt er um að Guðjón verði öskuillur ef hann verður á bekknum. „Það er bara einn orðinn pirraður af því þú settir þetta upp svona. Guðjón Pétur; það er ekki búið að velja liðið og ef hann er að horfa á þetta þá er hann orðinn brjálaður. Bara útaf þessu,“ sagði Reynir Leósson á Stöð2 Sport í síðustu viku.

Guðjón ræddi málið við Kjartan Atla Kjartan og blæs á þetta. „Ég segi bara áfram gakk, þetta verður skemmtilegt sumar og ef ég byrja ekki inná þá verð ég kominn í liðið fljótlega. Ég held að þetta verði skemmtilegt sumar og ég ætla hjálpa liðinu mínu að verða Íslandsmeistari,“ sagði Guðjón léttur í lund við Kjartan Atla.

Hann segir Hjörvar Hafliðason ítrekað hafa reynt að búa til sprengjur í kringum sig. „Þetta er ekki í fyrsta sinn sem Hjörvar reynir að búa til einhverjar sprengjur. Ég hlakka til að troða sokk upp í hann eins og venjulega. Það hefur áður gerst að einhverjir spá hinu og þessu, ég treysti Óskari og ætla að sanna að ég eigi að vera í liðinu.“

Óskar Hrafn Þorvaldsson er á leið inn í sitt fyrsta ár með Breiðablik og er með nýjar hugmyndir. „Þetta er eitthvað sem maður hefur aldrei upplifað áður, það eru margar nýjar breytur. Spila frá aftasta manni eins oft og hægt er.“